الله.....

عنوان صادم....و انا احب الحاجات اللي بتعمل صدمه من منطلق ان ضربه بالمطرقه و لا عشره بالشاكوش.....

اولا اللي هكتبه دا مش اكتر من استرسال خواطر عن  علاقتي بربنا"سبحانه و تعالي" و ماحدش يستني اني كل مره اكتب سبحانه و تعالي او العلي القدير لانه شئ ممل اني اكرر نفس الكلمه ف كل مره هذكر فيها اسم ربنا ف التدوينه دي و دا هيحصل كتييييير.

اولا علاقتي بربنا مرت بـ3 مراحل رئيسيه هي:
1_الإيمان الوراثي  
 2_الشك
  3_الإيمان عن اقتناع"و دي لها شرح كبير"

ممكن اقول ان كل مرحله رئيسيه من دول مرت بمراحل اخري فرعيه جواها و مرتبطه بها و دا هحاول اشرحه بالتفصيل ،اهم حاجه انكم تاخدوني علي قد عقلي سواء قريتوا الكلام دا او مقرتهوش و تفهموا ان دي مجرد خواطر وكلام مش اكتر يعني مش بتفلسف و لا بنظر و لا بخترع افكار جديده ف الدين الاسلامي لاني اساسا معرفش الافكار القديمه كويس.

المرحله الأولي الإيمان الوراثي:
 و دي عدي عليها كل البشر علي سطح الارض يعني بنتولد نلاقي ابهاتنا مؤمنين بدين معين سواء كان الاسلام او المسيحيه او حتي الهندوسيه فبنبقي زيهم و خلاص و الكل برضه بيسأل اهله و هو صغير عن ربنا و انه جه منين او ازاي ربنا موجود و احنا مش قادرين نشوفه و الكلام دا و ف الاغلب الاعم بيكون رد الاهل اسكت حرام اللي بتقوله دا و ربنا هيسخطك قرد و الكلام دا، و دا بيكون لسبب من اتنين يااما حالة الجهل عند الاهل نفسهم او الخوف من التفكير ف الحاجات دي و خلاص مجرد الخوف من التفكير و دا ابشع انواع البشر...المرحله دي ممكن تتقسم لـ3 مراحل فرعيه :

أ-مرحلة التقليد و خلاص:كل طفل بيقلد ابوه و امه و هم بيصلوا او بيقروا قران او الانجيل و ممكن البنات تلبس الحجاب و تجري تلعب به ف الشقه او العيال يحضنوا الصليب و يعملوا نفسهم بيصلوا و هكذا ف كل الديانات باختلافها 

 ب -مرحلة الاسئله الفلسفيه الكونيه العميقه بالنسبه لطفل:يعني كل واحد بيسأل اسئله تبدو ف غاية العمق و الفلسفه زي هو ربنا جه منين؟ وكان فين قبل كدا؟ و العيال بيجوا منين؟ و كلنا بنعدي عليها و الردود بتختلف و الاغلبيه من الاباء و الامهات بيمنعوا عيالهم من التفكير ف الحاجات دي تاني و قليلين جدا اللي بيسمحوا لعيالهم بالسؤال و ان كان اغلبهم بيكونوا من الملحدين او المعادين للاديان بشكل عام فدا بيكون راي موجه برضه مش نابع من الايمان بحرية التفكير 

ج -مرحلة الاقتناع الجزئي او الكلي:و هنا بيبدا الاختلاف بين البشر....الاطفال اللي بيخافوا من ابوهم و امهم مهما كانت ديانتهم دول اللي بيكونوا بشر عادين او احيانا من المتطرفين و الجماعات الارهابيه اما الاطفال اللي بيقتنعوا بالحسنه و يبطلوا يسئلوا فدول بيكونوا بشر وسطين ومعتدلين باختلاف ديانتهم اما اللي بيقرروا يكملوا ف الاسئله لنهايتها حتي لو كانوا بطلوا فتره و رجعوا تاني زي حالاتي كدا فدول بيكونوا ف الاغلب ملحدين او لادينين او ع الاقل مؤمنين علي شعره و دا مينفيش ان ممكن يكون فيهم متطرفين برضه لان الملحدين مش كلهم ملايكه و متنورين بجد.

جــان بول سارتــر

2_الشـــك:
بالنسبه لي انا بطلت اسئل الاسئله دي و انا ف 3 اعدادي و بالصدفه و انا في تاني سنه ف الجامعه قريت مقال ف جرنان الاخبار عن واحد اسمه جان بول سارتر و المقال كان بيناقش فكرة الماهيه و الوجود فقررت اني اعمل سيرش ع النت عن الرجل  دا و فعلا بدات الاقي له كتب و بدات اقراها و عرفت الوجوديه و بدأت مرحلة الشك ف حياتي.....كان اكتر شئ دفعني ف اتجاه الشك هو البؤس و الشقاء ف العالم"كلام كبير طبعا" يمكن انا و بشكل شخصي منتمي للطبقه الوسطي او البرجوازيه الصغيره لكن اتربيت ف حي الشرابيه"اكيد الكل عارفه"وشوفت ابشر عايشين ازاي حياة البؤس والقرف والزباله و اول حاجات ف ذكرياتي كطفل كانت نشرة الاخبار علي القناه الاولي و فيها العيال الفلسطينين ف الانتفاضه الاولي و العيال الصوماليين اللي بيموتوا من المجاعات...المهم ان تراكمات دا كله خليتني اوصل لفكرة ان لو ربنا موجود و سايب البشر يتعذبوا بالشكل دا و يعانوا من البؤس و الشقاء فيبقي وجوده زي قلته و من هنا عشت سنين ف الكليه مش قادر اصدق ان ربنا موجود رغم اني احيانا كان ربنا بيهديني و التزم و اروح اصلي ف الجامع شهر او اتنين و بعدين ارجع تاني و ف الاغلب الحاله دي مكنتش عن قناعه عقليه و علميه حقيقيه بقدر كونها عن احساس بالقهر  والظلم الإنساني و بيتهألي افضل دليل علي دا ان وقت حرب لبنان 2006 كنت معلق صورة السيد حسن نصر الله ف اوضتي و بتفرج علي قناة المنار الشيعيه ليل نهار حتي لما كانت بتذيع قرآن
3_الإيمان عن اقتناع:
عشان ميحصلش خلط ف المفاهيم فموضوع الاقتناع دا مش ابحاث علميه و كدا زي مصطفي محمود"اللي بكرهه جدا بالمناسبه" لاني معملتش ابحاث علميه في اي حاجه و لاني زي ماقلت ف السطور اللي فاتت ان موقفي المعادي لفكرة وجود ربنا مكانش علمي بقدر كونه موقف انساني....و للسبب دا بالذات كان لازم الموقف يتغير من فكرة الوجود الآلهي لما يتغير موقفي الانساني او لما استوعب الموقف الانساني بشكل مختلف.....تقريبا اللي هقولوا دا حادث فريد ف كتب التاريخ لان تقريبا انا الوحيد اللي رجعت آمنت بالله تاني لما بقيت شيوعي.

اي نعم لما بقيت شيوعي.....دا ممكن بتفهم من خلال الشرح اللي انا شرحته فوق بخصوص موضوع الموقف الانساني يعني لما استوعبت ان البؤس و الشقاء سببهم الانسان او بالتحديد البرجوازيه و وجود الملكيه الخاصه فموقفي كله اتغير، و ادركت ان الازمه مش عند ربنا دي عندنا احنا و قدرت استوعب الأيه اللي بتقول" إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ" و أقتنعت.


اكيد انا مش ملتزم دينيا بس ربنا يهدي و ابقي انسان ملتزم و اصلي و كدا يعني و اربي دقني كمان لو امكن:)....بس بالنسبه لي مش هي دي المعضله الرئيسيه بالنسبه لي الدين هو مجموعه اخلاق و صفات لما تتوافر ف انسان مهما كان شكله او مهما كانت تأديته للفروض فهو كدا يعتبر متدين  ومؤمن، مش تقليل من الفروض و لا حاجه بس رفع من قيمة الاخلاق .بالنسبه لي ربنا هو إله رحيم غفور عادل ميرضاش بالظلم و لايحبنا نكون ساكتين عليه مايرضاش بالاستغلال و لا بالقهر و البؤس،يعني إله ثـوري و الدين لازم يكون ثوري مش ركوبه لاصحاب الدقـون.

أحــلام....

مـن وانا صغير و انا احلامي بتتغير و تتنوع يعني كان نفسي ابقي لعيب كره احيانا و احيانا ظابط ساعات جيش او طيران او مخابرات بس الحمد لله عمري ماحلمت اكون ظابط شرطه....معرفش ليه!؟

رغم اني مكنتش معارض من زمان..كنت مؤيد لكل حاجه لحد اما دخلت الكليه او بالتحديد بعد اما عديت اعدادي كليه و دخلت قسم نحت و تشكيل معماري،ساعتها بقيت معارض لكل حاجه مش بس للنظام لا كمان للمجتمع و الدين و كل حاجه علي سطح الارض

نرجع للاحلام...لما بدات اقرا رجل المستحيل و ملف المستقبل حلمت اكون ظابط مخابرات و احيانا كنت بحلم اكون أدهم صبري و لما بدات اقرا روايات عالميه مترجمه  لتشارلز ديكنز و جولي فيرن و شكسبير بتاعت مكتبة الاسره"ماما سوزان سابقا" بدات احلم بحاجات مختلفه يعني مره اكون طيار و مره اكون كاتب و مره عالم او مخترع او او....لكن مفيش و لا مره برضه حلمت اني اكون مهندس....لاني مبحبش الرسم و لسوء الحظ او لفشل العمليه التعليميه بأكملها بقيت مهندس..ديكور،يعني الرســم كله 

واحد من احلام حياتي كان اني اتجوز بنت نوبيه سمرا شبه ممثلات السينما الامريكيه و بعد كدا حبيت Eva Mendez و قعدت ادور علي واحده شبهها احبها و ف الاغلب هقضي عمري كله ادور:) ،يمكن اتجوز اي بنت نوبيه سمرا بس مش هبطل ادور علي واحده شبهها.

واحد من احلام حياتي المتعدده و اللي بقت اكثر مما يمكن حصره و دا لاني اتعودت محققش حاجه منهم فاتعودت برضه احلم براحتي يعني احلام مجانيه...الحلم دا غريب شويه و هيزعل اغلب الرفاق مني،بحلم اني أروح إسرائيــــل.

ايوه إسرائيل.....الكيان العنصري ابن الوسخه دا،اللي محتل ارضنا و نافخنا دا.....هو دا،و بصراحه جاتلي فرصة شغل هناك و في مجالي في التصميمات و الديكورات و اللي بالمناسبه بقيت بحبها بجنون و بقيت كويس فيها كمان،المهم بخصوص فرصة الشغل في إسرائيل فدا كان في 2008 تقريبا عن طريق واحده اسرائيليه امريكيه عندي ف الفريندز ف الفيس بوك شافت صور شغلي و عرضت عليا شغل هناك و بصراحه كان نفسي اوافق و اللي منعني مش كون المكان دا صهيوني او انها احتمال تكون بتحاول تجندني للموساد وجو جمعة الشوال و الحوارات دي لكن اللي منعني اني عارف اني لو قلت yes ع الشات بعد دقيقتين مش اكتر هالاقي قوات الامن و المخابرات محاصره البيت و بيندهوني زي سعيد مهران و سلم نفسك و الكلام دا و ابقي جاسوس مع اني شيوعي ياجدعان.

مش المفروض البشر يشرحوا ليه بيحلموا بحاجه محدده لاي كائن كان بس لاني عارف ان دا حلم غريب شويه فانا هشرحه....انا بحلم اروح اسرائيل و واثق ان محدش بيكره ولاد الكلب دول قدي و لا حتي الفلسطينين ....انا بكره اسرائيل اكتر من اي حد خلقوا ربنا و واثق من دا و عشان كدا نفسي اروح هناك....نفسي اشوف العدو و اتعامل معاه و اعرفه كويس عشان لما ارجع مع المقاومه اقدر اساهم في هزيمتهم.....بالمناسبه الحلم رقم 2 تقريبا ف حياتي اني اشارك ف تحرير فلسطين و الحلم رقم 1 ف الاغلب اني اموت و انا بحارب الراسماليه و وكلاؤها المحلين اللي منهم اسرائيل و بالمناسبه كمان انا بعشق السينما الاسرائيلي و بتفرج علي افلام عاموس جيتاي و بحب جاباي ساسون وهيام عباس و بحب اسمع شوية اغاني من عندهم رغم انها شبه الموسيقي الفرنسي شويه و للاسف مش لاقي كتب مترجمه اقراها بس بتابع مدونة هكذا تكلم كوهيـن و ياريت تتابعوها.

و انا في 3 اعداي كنت بحلم اني هبقي امبراطور الكــون و حاكم الارض...ف الاغلب دا من تأثير قصص ملف المستقبل

المهم الاحلام في حياتي طول عمرها مجانيه مبحاولش احققها و الحياه بتمشي معايا بالصدفه يعني بقيت مهندس ديكور وحبيت الديكور و بقيت شاطر فيه بالصدفه..قريت عن الوجوديه و بقيت ملحد بالصدفه و رجعت آمنت بالله تاني بالصدفه و قريت عن الشيوعيه و بقيت شيوعي بالصدفه وهكذا كل مكان اشتغلت فيه او صديق اتعرفت عليه او كتاب قريته او فيلم شوفته كان بالصدفه.

حتي يوسف شاهين حبيته بالصدفه